1Pe 5 | AMNAMANAB | STEP | Afa koka nem siosna misog elim mo sihinuge. Ka gafa siosna misog el feg. Afa maia Krais susug flagba asa kikeafna nofna ka nangug. Afa maia Kraisna kwania unehlag ambala puguiba asa ka gafa suialag heafna flafe. Nasa ka nem enaig sihifenig.

aSnd 3:34

1 Peter 5

Siosna misog elni mo

1 Afa koka nem siosna misog elim mo sihinuge. Ka gafa siosna misog el feg. Afa maia Krais susug flagba asa kikeafna nofna ka nangug. Afa maia Kraisna kwania unehlag ambala puguiba asa ka gafa suialag heafna flafe. Nasa ka nem enaig sihifenig.

2 Afa sa ne Godna sipsipim numwehe nangwaghiagi asa ehe ehengelim nengelni ninga la fwatig. Afa enag gafugagba nimbeafna membug la sa ne esi afa God enaig onigig membeg masa el nem hekusihiagifi. Nofeka kig flag onigigna gafugafi amo sa ne Godna elim oniginim asa gafugafi. Ehengel eba sipsip lofug.

3 Afa nofeka misog el lofinim afa Godna elim mo piga lambpaigo. Nofeka enaig esi. God ehengelim nengelni ninga la fwatiba asa ne suialag mina ogfugonibi sa ma enag sipsip ena mina patalfui.

4 Afa maia sipsipni nangwaghiawagig elni misog el ambala puguiba asa ne suialag nemug wag flifi ena wag mas amtakwale.

5 Afa nengel kwablog el sa ne gafa misog elim ahnai skaufegon. Afa ne mungwali nimbefum ahnai skaufeaginim. Afa Godna mo enaig esog;

God tonbusug elim pigalau pifi. Afa el sa hefum sugupeg eba God ehem suialafenife. ^a
6 Asa ne Godna wasneigim ahnai skaufini afa osuna sa ehe eso fwahag, enanam ehe nem fingi fefe.

7 Afa God nem fwina aflafenig asa nimbeafgelni kinig heafna ninga la fwahi.

8 Sa ne numwehiaginim afa nof fiahgifibi. Afa Satan nengelni angoluwag eba ofenaiba laion ^{▼▼5:8Laion eba wasneig sis sangwalinai pusi lofug.} euaka ona elim tige ne.

9 Afa ne anwenafig mungwali hwa bite la nengelni kristen nilite gwenaig kinig flig asa nengelni olug onigig wasneig gofiba afa Satanim fingi fati.

10 Afa ne Sisas Kraisim olug oniginibi asa ilawana God nem aflafenigim awamona sa ne heafna suialag gawig la wahkig hawag fife. Afa kinig sa ne flag eba mwakwalig gofe afa sumi yi God ehe nem pese suiala fiahflanam asa nem wasneig na geba asa ne wasneig gofufe.

11 Na Godna unehlagim fingi fi asa ehe kwania wasneigni wahkig gofufe. Eba nufunam feg.

Pitana sumi yi mo

12 Afa hwa weti ginofba Sailas kam kwegfug ginofeg. Afa ka anwenafeg ehe bigelni suialag nilite. Kog ka nem wasneinuge na ka enaig esog hwa ginof eba Godna suialag kwefwag ogfug. Sa ne hwa mo kehlanam wasneig gofum.

13 Afa Babilon la nai sios el nengelim enaig esogog ka mas nem etetigoni. Afa God ehengelim gafa kanog fwatig. Afa Mak ofenaiba kana luwal ehe nem gwenaig esonig.

14 Afa mingnagim nilitem sa ne kikigehiagi enaba ogfug ne kristen nilitem fwina membegonig. Ne mungwali Kraisna el fi sa ma nem olug enesieg gohoni.